Կէտիկփաշայի «Հրանդ Տինք» վարժարանի 7-րդ դասարանի աշակերտուհիներէն Սիրուշօ Սարգսեան վերջերս նկարչութեան բնագաւառին մէջ արձանագրած է կարեւոր յաջողութիւն մը։ Ան Պոլիսէն մասնակցած է Հայաստանի Կրթութեան ու Գիտութեան Նախարարութեան կողմէ կազմակերպուած մրցոյթի մը, որուն խորագիրն էր «Հայոց աշխարհի մայրաքաղաքները»։ Համահայկական մանկապատանեկան նկարչական այս մրցոյթի աւարտին Սիրուշօ Սարգսեան առաջին դիրքը գրաւած է։ Սիրուշօ Սարգսեանի նկարը «Նոր Հայաստանի Ծնունդը» կը կոչուէր։ Իր ստեղծագործութեան մէջ տեղ գտած են Երեւանը եւ Զուարթնոցի հրաշագեղ տաճարի կանգուն մնացած կամարազարդ սիւները։

Վարժարանը նկարչութեան ուսուցիչ չունենալով  Սիրուշօ Սարգսեան ինքնուրոյն աշխատանքով հասած է այս նուաճումին։