Ճատրակի Աշխարհի Ախոյեան Դարձած 7 Տարեկան Արէն Էմրիկեանը
ԱՄՆ Չիքակօ քաղաքի բնակիչ 7 տարեկան Արէն Էմրիկեանը դարձած է ճատրակի աշխարհի ախոյեան մինչեւ 8 տարեկան երեխաներու մրցոյթին։
«Մայրս ինծի սորվեցուցած է ճատրակ խաղալ։ Չեմ յիշեր, թէ երբ խաղացած եմ առաջին խաղս, այնքան շատ ժամանակ անցած է, հաւանաբար` երկու տարի։ Կարծեմ մայրս կ’ուզէր, որ ես իւրայատուկ ըլլամ, ան կը մտածէր, որ ճատրակը լաւ եւ տրամաբանական խաղ է», – նշած է Արէն Էմրիկեանը։
Անոր կարծիքով, ճատրակը իսկական զուարճանք է, եթէ ճիշտ խաղաս եւ խարդախութիւն չընես։
«Ես ամէն շաբաթ մէկուկէս ժամ կը մարզուիմ մարզիչիս հետ ։ Սովորաբար ջղային խաղացող եմ եւ կրնամ 4–5 քայլ առաջ մտածել։ Պաշտպանութեան մէջ այդքան ալ լաւ չեմ, երբ պաշտպանողական ոճով կը խաղամ, կը պարտուիմ», – նշած է փոքրիկ Արէնը։
Արէնի խօսքով` Պրազիլիոյ մէջ տարած յաղթանակը իրեն համար մեծ անակնկալ էր։
«Ոգեւորուած էի, որ պիտի մասնակցիմ, բայց շատ լարուած էի։ Չէի սպասեր, որ կը յաղթեմ», – նշած է Արէնը։
Բացի ճատրակէն, Արէնը կը սիրէ ընթերցանութիւն։
«Կը սիրեմ Հարի Փոթթերի մասին պատմող գիրքերն ու ֆիլմերը»,– ըսած է ան։
