Հայկաշխարհը Տիկին Նունէ Սարգսեանի Հիւրն էր
Դեկտեմբեր 24-ին, Հայկաշխարհը «Հրաշագործ Նռանէ» գիրքի հեղինակ 13-ամեայ Ժասմին Հայրապետեանը ներկայացուց ՀՀ առաջին Տիկին Նունէ Սարգսեանին։ Հանդիպումը կայացաւ ջերմ մթնոլորտի մէջ, Ժասմինը շատ ոգեւորուեցաւ Տիկին Նունէ Սարգսեանի ջերմ ընդունելութենէն ու խօսքերէն, որոնք խթան հանդիսացան, որ նոյն օրը Ժասմինը սկսի գրել իր երկրորդ գիրքը։
Ժասմինը հանդիպման մասին իր զգացումները արտայայտելով ըսաւ,- «Այսօր կեանքիս զարմանահրաշ ու յուզիչ օրերէն մէկն էր: Նախագահական նստավայրի մէջ հիւր էի Տիկին Նունէ Սարգսեանին:
Առաջին վայրկեանէն սիրեցի մեր երկրի նախագահի Տիկինը. ան աննկարագրելի լաւ մարդ է: Խօսեցանք գիրքիս մասին, նաեւ ուրիշ գիրքերու, գրականութեան, արուեստի, ապագայի մասին:
Մեր ջերմ զրոյցի ընթացքին Տիկին Նունէն ինծի նոր գիրքի գաղափար տուաւ: Ես այնպէ՜ս տարուեցայ այդ գաղափարով, որ ոգեւորութեանս ալիքի տակ արդէն սկսած եմ գրել: Շնորհակալ եմ այս իւրայատուկ օրուայ համար: Յատուկ շնորհակալութիւն իմ սիրելի Հայկաշխարհին»: