Ուկանտացի 7 Տարեկան Կրահամ Շէման` Օդաչու
Ուկանտացի 7-ամեայ փոքրիկը իր երկրին մէջ զարմացուցած է` օդանաւ քշելու վարպետութեամբ,
արդէն զինք կը կոչեն «Քափթըն»: Գերմանիոյ դեսպանը եւ երկրի փոխադրութեան նախարարը զինք հանդիպումներու հրաւիրած են:
Երբ Կրահամ 3 տարեկան էր, ոստիկանութեան ուղղաթիռներէն մէկը այնքան ցածէն անցած է,
որ ան թռցուցած է Կրահամի մեծ մօր տան տանիքը, մինչ Կրահամ կը խաղար բակին մէջ:
Այս պատահարը տպաւորած է փոքրիկը, ան սկսած է օդանաւներու մասին անվերջանալի
հարցումներ ուղղել մօրը:
Կրահամ այնքան հետաքրքրուած էր օդանաւներով, որ անոր մայրը զայն արձանագրած է
թռիչքի մօտակայ դպրոցի մը մէջ, եւ Կրահամ սկսած է սորվիլ օդանաւներու կտորներու եւ թեքնիք
բաժիններու մասին:
Հինգ ամիս ետք ան սկսած է թռիչքի դասերը: Արտայայտուելով իր առաջին թռիչքի մասին` ան ըսած է,
թէ զգացած էր դէպի երկինք բարձրացող թռչունի մը նմանի:
Կրահամի նախասիրած նիւթերը թուաբանութիւնն ու գիտութիւնն են: Անոր երազն է օր մը դառնալ
օդաչու եւ աստղանաւորդ:
