Փոքրիկը կը նայի, թէ տատիկը ինչպէս նամակ կը գրէ եւ կը հարցնէ.
– Դուն ի՞մ մասիս կը գրես:
Տատիկը կը դադրեցնէ գրելը, կը ժպտի եւ կը պատասխանէ.
– Գուշակեցիր, ես կը գրեմ քու մասիդ: Բայց կարեւորը այն չէ, թէ ինչ կը գրեմ, այլ այն, թէ ինչով կը գրեմ: Ես կ’ուզէի, որ դուն, երբ մեծնաս, դառնաս այնպիսին, ինչպիսին է այս մատիտը…
Փոքրիկը հետաքրքրութեամբ կը նայի մատիտին, բայց իւրայատուկ բան չի նկատեր:
– Ասիկա սովորական մատիտ է, ինչպէս բոլոր մատիտները:
– Ամէն ինչ կախուած է անկէ, թէ ինչպէս կը դիտես իրերը: Այս մատիտը օժտուած է հինգ որակով, որոնք անհրաժեշտ են քեզի, եթէ կ’ուզես կեանքը ճիշտ եւ դիւրին ապրիլ:
Առաջինը՝ դուն կրնաս հանճար ըլլալ, բայց երբեք պէտք չէ մոռնաս Ուղորդող Ձեռքի գոյութեան մասին: Մենք այդ ձեռքը կ’անուանենք Վերին ուժեր: Վստահիր այդ ուժին եւ սորվիր զգալ զայն:
Երկրորդը՝ գրելու համար ես ստիպուած էի սրել մատիտը: Այս գործողութիւնը քիչ մը ցաւոտ է մատիտի համար, բայց փոխարէնը, անկէ ետք մատիտը աւելի յստակ կը գրէ: Հետեւաբար՝ կարողութիւն ունեցիր դիմանալու ցաւին, յիշելով, որ ան կը վեհացնէ քեզ:
Երրորդը՝ եթէ կ’օգտուիս մատիտէն, ուրեմն միշտ հնարաւոր է ջնջել ռետինով այն, ինչ կը համարես սխալ կամ ոչ պիտանի: Յիշէ, որ ինքզինքդ ուղղելը ո՛չ միշտ է որ վատ է: Յաճախ անիկա միակ տարբերակն է ճիշտ ճանապարհէն չշեղուելու համար:
Չորրորդը՝ Մատիտի մէջ կարեւորը փայտը չէ, ինչէն ան պատրաստուած է, եւ ո՛չ ալ անոր ձեւը, այլ գրաքարը, որ կը գտնուի անոր մէջ: Այդ պատճառով միշտ մտածէ ա՛յն մասին, թէ ինչ կը կատարուի քու ներսդ:
Եւ վերջապէս հինգերորդը՝ մատիտը միշտ իր ետեւէն հետք կը ձգէ: Նոյն ձեւով դուն ալ քու ետեւէդ հետք կը ձգես քու արարքներովդ, եւ այդ պատճառով՝ մտածէ՛ իւրաքանչիւր քայլդ կատարելէն առաջ:
աղբիւր` mediamag.am
արեւմտահայերէնի վերածեց ՀԱՅԿԱՇԽԱՐՀ-ը