«Կարկաչ»ի «Սուրբ Ծննդեան խորհուրդը» Օրաթորիայի Անդրանիկ Կատարումը Լիբանանի Մէջ
Համազգայինի Լիբանանի Շրջանային վարչութեան կազմակերպութեամբ, Յունուար 4-ին, Սրբոց Վարդանանց եկեղեցւոյ մէջ, Համազգայինի «Կարկաչ» երգչախումբը ներկայացուց «Սուրբ Ծննդեան խորհուրդը» օրաթորիայի անդրանիկ կատարումը` խմբավարութեամբ Զաքար Քէշիշեանի եւ դաշնակահար Լիանա Յարութիւնեանի:
Գեղարուեստական ղեկավար եւ խմբավար Զաքար Քէշիշեանը ներկայացման սկիզբը բարի գալուստի խօսք արտասանեց եւ իր մաղթանքները տուաւ Նոր տարուան եւ Ս. Ծննդեան տօներուն առիթով:
«Կարկաչ»-ի համերգը բաղկացած էր տարբեր երգերէ, ինչպէս՝ «Կարկաչ», «Պէյրութ», «Սանթա Քլոզ իզ քամինկ թու թաուն», «Ուեն տը սէյնթս կօ մարչինկ ին», «Քում պա եա», եւ այլն:
Երգահան Արմենուհի Կարապետեանի հեղինակած օրաթորիան բաղկացած էր ութ մասերէ` «Փոքրիկ քաղաք Բեթղեհէմի», «Փառք Քեզ, օրհնեալ Տէր», «Աւետիսներ», «Այսօր տօնն է Ս. Ծննդեան», «Յայտնուեց մեզ Նա», «Ցնծա՛, աշխարհ», «Օրհնեալ է Աստուած» երգը խմբավարեց «Բարսեղ Կանաչեան» երաժշտանոցի նախկին ուսանողներէն Լուսի Գռուզեան, իսկ «Քրիստոս ծնաւ եւ յայտնեցաւ» երգին միացան եկեղեցւոյ զանգերուն ղօղանջները:
Ձեռնարկի աւարտին երկար հնչեցին ծափահարութիւնները, կարծես Ս. Ծննդեան խորհուրդը հպած էր բոլորին սրտերուն եւ հոգիներուն` անդորրութիւն եւ խաղաղութիւն պարգեւելով բոլորին:
