Արտաշէս թագաւոր Աշխարհակալ կոչուեցաւ, որովհետեւ ան գրաւեց բոլոր հայերէն խօսող ցեղերու երկիրները եւ Հայաստանի սահմանները ընդարձակեց: Ան շինեց նոր մայրաքաղաք մը, որ իր անունով Արտաշատ կոչուեցաւ:
Արտաշէս Աշխարհակալ մինչեւ խոր ծերութիւն թագաւորեց Հայաստանի վրայ:
Մահուան օրը ծերունի թագաւորը բարկացաւ իր Արտաւազդ զաւակին վրայ, անիծեց զայն եւ ըսաւ անոր.
– Երբ դուն որսի երթաս Ազատ Մասիսն ի վեր, քաջքերը թող շղթայեն քեզ ու բանտարկեն Ազատ Մասիսի մեծ անդունդին մէջ: Հոն մնաս եւ երբեք լոյս չտեսնես:
Կ’ըսուի, թէ հօր անէծքը կը կատարուի: Որսի պահուն՝ Արտաւաազդ իր նժոյգին հետ կը գլորի անդունդին մէջ եւ քաջքերը զինք կը կապեն շղթաներով:
Երբեմն ամպեր կը հաւաքուին լերան գագաթին եւ կայծակներ կը շողան: Կ’ըսուի, թէ այդ պահուն չար ու բարի ոգիները կը կռուին, իսկ անդունդի մէջ որսի շուներ կը կրծեն Արտաւազդի շղթաները:
Մարդիկ կը հաւատան, որ օր մը Արտաւազդ լոյս աշխարհ պիտի գայ:
