Ինչպէ՞ս Էր Առաջին Պատկերասփիւռը
Առաջին պատկերասփիւռը ստեղծուեցաւ 1926-ին, Անգլիոյ մէջ: Անիկայ կը նմանէր մեծ ձայնասփիւռի մը եւ անոր պաստառը շատ փոքր էր: Սփռուած նկարները կարմիր եւ սեւ էին եւ` բաւական կարելի էր ճանչնալ դէմքեր:
Ինչպէ՞ս Կը Կազմուին Քարայրները
Երբ կ’անձրեւէ, ջուրին մէջ գտնուող թթուն կը յարձակի ժայռերուն վրայ եւ կը թափանցէ անոնց մէջ` ճեղքերուն ընդմէջէն: Ճեղքերը կը մեծնան, մինչեւ որ քարայրները կազմուին: Մաշումը շատ դանդաղ կը պատահի, սակայն երբեմն անիկա կ’արագանա՛յ, երբ գետ մը կը մտնէ գետնին տակ` այս ձեւով ջրհորներ եւ ներքնուղիներ փորելով:
Ուրկէ՞ Գիտենք, Որ Արեւը Լուսինէն Աւելի Մեծ Է
Մենք այն տպաւորութիւնը ունինք, թէ արեւը եւ լուսինը նոյն չափի են: Սակայն արեւը լուսինէն 400 անգամ աւելի մեծ է: Եւ որովհետեւ ան երկրագունդէն 400 անգամ աւելի հեռու է, քան լուսինը, անոր չափը կը թուի լուսինին չափ երեւիլ:
աղբիւրը ԿԿՈՒ (Հալէպ)