Քուէյթի Ազգային Վարժարանի Աշակերտները Յոյս եւ Կորով Ներշնչեցին Հիւանդներուն
Աշակերտներու ընկերային ծառայութեան ոգին զարգացնելու միտող ծրագիրներու շրջագիծէն ներս, Հինգշաբթի, 26 Հոկտեմբեր 2017ին Քուէյթի Ազգային Վարժարանի 12-րդ կարգի աշակերտ-աշակերտուհիները, Վարժարանիս Արաբ փոխ Տնօրէնուհի Տիկին Ռատիիա Ալ Ճաաֆարի եւ կարգ մը ուսուցիչներու ընկերակցութեամբ այցելեցին «Պատրիա Ահմատ Ալ Սուպահ» հիւանդանոցի Քաղցկեղի «Ալ Ստրա» բժշկական բաժինը, ուր ծանօթացան կեդրոնի իւրաքանչիւր բաժնին, վարդեր նուիրեցին հիւանդներուն, մօտէն հետեւեցան անոնց առողջական վիճակին եւ քաջալերական խօսքերով խանդավառեցին անոնց ներաշխարհը:
Միջոցին անոնք յոյս եւ կորով ներշնչող ասացուածքներով պատրաստուած պատի թերթ մը եւ դպրոցի աշակերտներուն կողմե գծագրուած եւ դպրոցի ստորագրութիւնը կրող գեղեցիկ արուեստի կտոր մը նուիրեցին կեդրոնին։
Սոյն այցելութիւնը կեանքի հարուստ փորձառութիւն մը եղաւ աշակերտներուն համար, ուր անոնք զգացին իւրաքանչիւր հիւանդի մղած պայքարը յանուն առողջ կեանքի:
Արդ, անոնք հոգեկան մեծ բաւարարութիւն զգացին, որով քանի մը ժամուան համար կրցան ժպիտ գծագրել հիւանդներու դէմքին եւ հարստացած ներաշխարհով ու վերանորոգուած զգացումներով վերադարձան վարժարան: